yoyo – emac

ສູນການຄຸ້ມຄອງສິ່ງແວດລ້ອມ ແລະ ຄວບຄຸມມົນລະພິດ ພາຍໃນເຂດເສດຖະກິດພິເສດ ແຂວງ ສະຫວັນນະເຂດ

December 13, 2023 yoyo Leave a comment ໂຄງການສູນ

ສູນການຄຸ້ມຄອງສິ່ງແວດລ້ອມ ແລະ ຄວບຄຸມມົນລະພິດ ພາຍໃນເຂດເສດຖະກິດພິເສດ ແຂວງ ສະຫວັນນະເຂດ ເພື່ອຕອບສະໜອງຕໍ່ແນວຄິດການພັດທະນາຂອງລັດຖະບານ ແລະ ທິດທາງສູ່ລະດັບສາກົນສຳລັບການພັດທະນາທີ່ຍືນຍົງ (Sustainable Development) ມີຄວາມຈຳເປັນຕ້ອງກະກຽມຄວາມພ້ອມລະບົບໂຄງຮ່າງພື້ນຖານດ້ານການປົກປັກຮັກສາສິ່ງແວດລ້ອມທີ່ຈຳເປັນ ເພື່ອຮັບປະກັນຢ່າງເຂັ້ມແຂງ ແລະ ເປັນກົນໄກໃນການເຄື່ອນໄຫວຄຸ້ມຄອງ ແລະ ຄວບຄຸມຜົນກະທົບຕໍ່ສິ່ງແວດລ້ອມທຳມະຊາດ ແລະ ສັງຄົມ ທີ່ຈະເກີດຂື້ນ ດັ່ງນັ້ນ, ຈື່ງຈຳເປັນຕ້ອງລິເລີ່ມສ້າງ ສູນການຄຸ້ມຄອງສິ່ງແວດລ້ອມ ແລະ ຄວບຄຸມມົນລະພິດ ພ້ອມທັງພັດທະນາ ໂຮງງານຕົ້ນແບບກ່ຽວກັບອຸດສາຫະກຳຊັບພະຍາກອນໝຸນວຽນ ເຊີ່ງມີຈຸດປະສົງເພື່ອຕອບສະໜອງນະໂຍບາຍສົ່ງເສີມການລົງທຶນພາຍໃນ ເຂດເສດຖະກຳພິເສດແຂວງ ສະຫວັນນະເຂດ ແລະ ຊຸກຍູ້ສົ່ງເສີມມາດຕະຖານອຸດສາຫະກຳ ພາຍໃນຂອງປະເທດລາວອີກດ້ວຍ. ສູນການຄຸ້ມຄອງສິ່ງແວດລ້ອມ ແລະ ຄວບຄຸມມົນລະພິດຕັ້ງຢູ່ຈຸດ B1 ເຂດເສດຖະກິດພິເສດ ແຂວງ ສະຫວັນນະເຂດ ມີເປົ້າໝາຍດັ່ງຕໍ່ໄປນີ້: ເປັນສູນກາງສະໜັບສະໜຸນການບຳບັດ-ກຳຈັດສິ່ງເສດເຫຼືອອຸດສາຫະກຳເປັນພິດອັນຕະລາຍທີ່ເກີດຂື້ນພາຍໃນ ສປປ ລາວ ສົ່ງເສີມການລົງທຶນ ແລະ ສະໜັບສະໜຸນການຂະຫຍາຍອຸດສາຫະກຳໝຸນວຽນ ພາຍໃນ ສປປ ລາວ ໃຫ້ໄດ້ຕາມຫຼັກການທາງວິຊາການ ເປັນຕົ້ນແບບຂອງອຸດສາຫະກຳ ຕາມຫຼັກເສດຖະກິດໝຸນວຽນຢ່າງຄົບວົງຈອນ (Circular Economy) ຕາມມາດຕະຖານສາກົນ 3Rs, Lean, Clean Technology (CT), ISO ສູນການສຶກສາຮຽນຮູ້ດ້ານການຄຸ້ມຄອງສິ່ງແວດລ້ອມ ເພື່ອສົ່ງເສີມການອະນຸລັກ ແລະ ພະລັງງານ ເປັນສະຖານທີ່ຄົ້ນຄວ້າຂໍ້ມູນ ສົ່ງເສີມການພັດທະນາອຸດສາຫະກຳຊັບພະຍາກອນທົດແທນ ກຽມພ້ອມຮ່ວມມືກັບອົງການສາກົນດ້ານສິ່ງແວດລ້ອມ

ມາດຕະຖານການກວດກາວັດແທກອຸນຫະພູມ ໃນສະຖານທີ່ເຮັດວຽກ

August 31, 2023 yoyo ມາດຕະຖານສິ່ງແວດລ້ອມ ແລະ ການຕິດຕາມກວດກາ

ມາດຕະຖານການກວດກາວັດແທກອຸນຫະພູມ ໃນສະຖານທີ່ເຮັດວຽກ ອຸນຫະພູມເວັດບັດໂກບ (Wet Bulb Globe Temperature: WBGT) ເປັນດັດສະນີວັດແທກຄວາມຮ້ອນໃນສິ່ງແວດລ້ອມການເຮັດວຽກ (ມີຫົວໜ່ວຍເປັນອົງສາເຊ) ເຊິ່ງໄດ້ເອົາປັດໄຈທີ່ມີຜົນກະທົບຕໍ່ຄວາມຮ້ອນທີ່ສະສົມໃນຮ່າງກາຍມາພິຈາລະນາ ໄດ້ແກ່ ຄວາມຮ້ອນທີ່ເກີດຂື້ນພາຍໃນຮ່າງກາຍຂະນະເຮັດວຽກ ແລະ ຄວາມຮ້ອນຈາກສິ່ງແວດລ້ອມການເຮັດວຽກ ເຊິ່ງຄວາມຮ້ອນຈາກສິ່ງແວດລ້ອມການເຮັດວຽກຖຶກຖ່າຍເທມາຍັງຮ່າງກາຍໄດ້ 3 ວິທີຄື: ການນຳ, ການພາ ແລະ ການແຜ່ລັງສີຄວາມຮ້ອນ ຄິດໄລ່ໄດ້ຈາກສູດດັ່ງນີ້: WBGT = 0.7 NWB + 0.3 GT (ໃນກໍລະນີກວດກາວັດແທກໃນອາຄານ ຫຼື ນອກອາຄານທີ່ບໍ່ມີແດດ) WBGT = 0.7 NWB + 0.2 GT + 0.1 DB (ໃນກໍລະນີກວດກາວັດແທກນອກອາຄານ ແລະ ມີແດດ) ໂດຍ NWB ໝາຍເຖິງ Natural Wet Bulb (ມີຫົວໜ່ວຍເປັນອົງສາເຊ) ອຸນຫະພູມຈາກເຄື່ອງວັດອຸນຫະພູມແບບປຽກຕາມທຳມະຊາດ ແທນການວັດອຸນຫະພູມທີ່ຜິວໜັງ ເຊິ່ງຖ້າເຫື່ອສາມາດລະເຫີຍໄດ້ ອຸນຫະພູມນີ້ຈະຕ່ຳກວ່າອຸນຫະພູມອາກາດ GT ໝາຍເຖິງ Globe Temperature (ມີຫົວໜ່ວຍເປັນອົງສາເຊ) ອຸນຫະພູມຈາກເຄື່ອງວັດອຸນຫະພູມແບບໂກບ ເປັນການວັດຄວາມຮ້ອນຈາກການແຜ່ລັງສີ DB ໝາຍເຖິງ Dry Bulb (ມີຫົວໜ່ວຍເປັນອົງສາເຊ) ອຸນຫະພູມຈາກເຄື່ອງວັດອຸນຫະພູມແບບແຫ້ງ ເປັນການວັດອຸນຫະພູມອາກາດ ເຊິ່ງຖ່າຍເທຄວາມຮ້ອນໂດຍຜ່ານການພາ ໃນປະຈຸບັນ ເພື່ອຄວາມສະດວກໃນການກວດກາວັດແທກ ບໍລິສັດຜູ້ຜະລິດອຸປະກອນກວດກາວັດແທກດັດສະນີວັດແທກຄວາມຮ້ອນ ໄດ້ຄິດຄົ້ນເຄື່ອງມືເອເລັກໂຕຣນິກທີ່ສາມາດອ່ານຄ່າ WBGT ໄດ້ທັນທີ ໂດຍບໍ່ຕ້ອງຄິດໄລ່ຄ່າ WBGT ໂດຍການໃຊ້ສູດຄິດໄລ່. ເຊິ່ງເຄື່ອງມືວັດລະດັບຄວາມຮ້ອນ WBGT ຊະນິດທີ່ສາມາດອ່ານຄ່າ ແລະ ຄິດໄລ່ຄ່າ WBGT ໄດ້ໂດຍກົງຕ້ອງມີຄຸນລັກສະນະຂອງເຄື່ອງສອດຄ້ອງກັບມາດຕະຖານ ISO 7243 ການຕິດຕັ້ງເຄື່ອງວັດແທກອຸນຫະພູມໃນສະຖານທີ່ເຮັດວຽກຕ້ອງຢູ່ໃນລະດັບໜ້າເອິກ ຂອງພະນັກງານຜູ້ທີ່ເຮັດວຽກໃນຈຸດດັ່ງກ່າວ ໂດຍກວດກາວັດແທກໃນຊ່ວງເວລາທີ່ມິີຄວາມຮ້ອນສູງຂອງການເຮັດວຽກເປັນໄລຍະເວລາ 2 ຊົ່ວໂມງ ສາມາດເກີດຂື້ນໄດ້ 2 ກໍລະນີຄື: ພື້ນທີ່ເຮັດວຽກມີຄວາມຮ້ອນສະໝໍ່າສະເໝີທົ່ວບໍລິເວນເຮັດວຽກ ໃຫ້ວັດແທກອຸນຫະພູມໃນຈຸດດຽວ ພື້ນທີ່ເຮັດວຽກມີຄວາມຮ້ອນບໍ່ສະໝໍ່າສະເໝີ ໃຫ້ວັດແທກອຸນຫະພູມໃນແຕ່ລະຊ່ວງເວລາຂອງການເຮັດວຽກທີ່ມີອຸນຫະພູມປ່ຽນແປງ ຫຼື ພະນັກງານເຮັດວຽກຫຼາຍຈຸດ ໃຫ້ວັດແທກທຸກຈຸດ ທີ່ຜູ້ອອກແຮງງານເຮັດວຽກ ແລ້ວຊອກຫາຄ່າສະເລ່ຍດັ່ງນີ້: ໂດຍ WBGT1 = ຄ່າດັດສະນີ WBGT ທີ່ຈຸດເຮັດວຽກທີ 1, t1 = ໄລຍະເວລາສຳຜັດຄວາມຮ້ອນຈຸດທີ 1 WBGT2 = ຄ່າດັດສະນີ WBGT ທີ່ຈຸດເຮັດວຽກທີ 2, t2 = ໄລຍະເວລາສຳຜັດຄວາມຮ້ອນຈຸດທີ 2 t1+t2+t3+…+tn = 2 ຊົ່ວໂມງທີ່ມີອຸນຫະພູມເວັດບັດໂກບ (WBGT) ສູງສຸດ ຄ່າມາດຕະຖານອຸນຫະພູມຈະຂື້ນກັບຄວາມໜັກເບົາຂອງວຽກທີ່ເຮັດດັ່ງນີ້: ວຽກເບົາ ແມ່ນເຜົາຜານພະລັງງານບໍ່ກາຍ 200 ກິໂລແຄລລີ້/ຊົ່ວໂມງເຊັ່ນ: ການເຮັດວຽກໃນວຽກຫ້ອງການ, ຂັບລົດຍົກ, ກວດສອບຄຸນນະພາບ, ປະກອບວັດສະດຸເບົາ, ຕັດຜ້າ, ຫຍິບ, ຖັກ, ແສ່ວ, ຄວບຄຸມເຄື່ອງຈັກ, ຍ່າງດ້ວຍຄວາມໄວບໍ່ກາຍ 3.2 ກິໂລແມັດ/ຊົ່ວໂມງ ຕ້ອງມີອຸນຫະພູມບໍ່ເກີນ 34 ອົງສາເຊ ວຽກປານກາງ ແມ່ນເຜົາຜານພະລັງງານແຕ່ 201-350 ກິໂລແຄລລີ້/ຊົ່ວໂມງເຊັ່ນ: ການຂັບລົດເຄນ, ບັງຄັບເຄື່ອງຈັກຂະໜາດໃຫຍ່, ການປະກອບວັດສະດຸທີ່ມີນ້ຳໜັກຫຼາຍ, ຈັດເຄື່ອງ, ຍົກເຄື່ອງທີ່ມີນ້ຳໜັກບໍ່ກາຍ 20 ກິໂລກຮາມ, ຍູ້ລໍ້, ລີດຜ້າ, ຍ່າງດ້ວຍຄວາມໄວແຕ່ 3.2-4.8 ກິໂລແມັດຕໍ່ຊົ່ວໂມງ ຕ້ອງມີອຸນຫະພູມບໍ່ເກີນ 32 ອົງສາເຊ ວຽກໜັກ ໃຊ້ພະລັງງານບໍ່ກາຍ 350 ກິໂລແຄລລີ້/ຊົ່ວໂມງເຊັ່ນ: ລາກ ຫຼື ຍົກສິ່ງຂອງທີ່ມີນ້ຳໜັກຫຼາຍກວ່າ 20 ກິໂລກຮາມ, ການເລື່ອຍໄມ້, ການອະນາໄມເສດແຮ່ໃນເຕົາຫຼອມໂລຫະ ຕ້ອງມີອຸນຫະພູມບໍ່ເກີນ 30 ອົງສາເຊ ພະລັງງານທີ່ໃຊ້ເຂົ້າໃນການເຮັດວຽກສາມາດປະເມີນຢ່າງລະອຽດໄດ້ຈາກທ່າທາງການເຄື່ອນໄຫວຂອງຮ່າງກາຍເຊັ່ນ: ນັ່ງ, ຢືນ, ຍ່າງ… ແລະ ກິດຈະກຳເຊັ່ນ: ການເຮັດວຽກເບົາ ຫຼື ໜັກດ້ວຍມື, ແຂນຂ້າງດຽວ ຫຼື ແຂນສອງຂ້າງ ແລະ ເຮັດວຽກດ້ວຍຮ່າງກາຍທຸກສ່ວນ. ເຊິ່ງຈະມີສູດຄິດໄລສະເພາະຕ່າງຫາກ ແຫຼ່ງທີ່ມາ: ຂໍ້ຕົກລົງ ວ່າດ້ວຍມາດຕະຖານສຽງດັງ, ແສງສະຫວ່າງ ແລະ ອຸນຫະພູມ ສຳລັບໂຮງງານອຸດສາຫະກຳປຸງແຕ່ງ ແລະ ຫັດຖະກຳ ເລກທີ 0168/ອຄ, ລົງວັນທີ 09 ກຸມພາ 2023 Hot Environment Measurement (Thailand)

ການຄຸ້ມຄອງສິ່ງແວດລ້ອມຂອງໂຮງງານອຸດສາຫະກຳປຸງແຕ່ງເຫຼັກ

August 31, 2023 yoyo ການຄຸ້ມຄອງສິ່ງແວດລ້ອມຂອງໂຮງງານອຸດສາຫະກຳ

ການຄຸ້ມຄອງສິ່ງແວດລ້ອມຂອງໂຮງງານອຸດສາຫະກຳປຸງແຕ່ງເຫຼັກ 1. ຄວາມໝາຍຂອງໂຮງງານອຸດສາຫະກຳປຸງແຕ່ງເຫຼັກ ໂຮງງານອຸດສາຫະກຳປຸງແຕ່ງປຸງແຕ່ງ ໝາຍເຖິງ ໂຮງງານທີ່ນຳໃຊ້ວັດຖຸດິບ ເຊັ່ນ: ແຮ່ເຫຼັກ, ເຫຼັກແທ່ງ, ເຫຼັກເສດ ເປັນຕົ້ນຕໍ ເຂົ້າຜ່ານຂະບວນການປຸງແຕ່ງ ປ່ຽນຈາກສະພາບເດີມມາເປັນຜະລິດຕະພັນເຫຼັກ ດ້ວຍການນຳໃຊ້ເຄື່ອງຈັກ ແລະ ແຮງງານຄົນຢູ່ພາຍໃນໂຮງງານ, ເຊິ່ງຜະລິດຕະພັນເຫຼົ່ານັ້ນສາມາດເອົາໄປຈຳໜ່າຍເປັນສິນຄ້າໄດ້. 2. ປະເພດຂອງໂຮງງານອຸດສາຫະກໍາ ໂຮງງານອຸດສາຫະກຳປຸງແຕ່ງເຫຼັກ ແມ່ນປະເພດໂຮງງານປຸງແຕ່ງເຫຼັກ ທີ່ເປັນແບບອຸດສາຫະກຳ ໂດຍນຳໃຊ້ເຕັກໂນໂລຊີທີ່ເໝາະສົມ ແລະ ນຳໃຊ້ເຄື່ອງຈັກເປັນຕົ້ນຕໍເຂົ້າໃນຂະບວນການຜະລິດ ເຊັ່ນ: ຂັ້ນຕອນການຫຼອມ, ການຫຼໍ່, ການເຜົາ, ການຊຸບ, ການໜີບ, ການຮີດ, ການພັບ, ການຕັດ, ການເຈາະ, ການຊ່ຽນ, ການຂັດ, ການຍົກຍໍ ແລະ ອື່ນໆ. ໂດຍຂະແໜງທຸລະກິດ (LSIC, Laos Standard for Industrial Classification) ໄດ້ຈັດແບ່ງໂຮງງານອຸດສາຫະກໍາປຸງແຕ່ງເຫຼັກອອກເປັນ 13 ປະເພດຍ່ອຍຄື: 24101 ການຜະລິດເຫຼັກກ້າ 24109 ການຜະລິດເຫຼັກຂັ້ນພື້ນຖານ ແລະ ເຫຼັກກ້າ 24310 ການຫຼອມເຫຼັກ ແລະ ເຫຼັກກ້າ 25111 ການຜະລິດປະຕູເຫຼັກ, ປ່ອມຢ້ຽມ ແລະ ຂອບຂອງມັນ 25112 ການຜະລິດໂຄງການເຫຼັກ 25119 ການຜະລິດ ຜະລິດຕະພັນໂລຫະທີ່ເປັນໂຄງສ້າງອື່ນໆທີ່ຍັງບໍ່ຈັດເຂົ້າບ່ອນໃດ 25120 ການຜະລິດຖັງ, ອ່າງເກັບນ້ຳ ແລະ ເຄື່ອງບັນຈຸທີ່ເຮັດດ້ວຍໂລຫະ 25910 ການຕີ, ໜີບ, ການຢໍ້າ ແລະ ການມ້ວນໂລຫະ, ການຫຼອມເສດມຸ່ນໂລຫະ 25920 ການສ້ອມແຊມຕົບແຕ່ງ ແລະ ເຄືອບໂລຫະ 25930 ການຜະລິດເຄື່ອງມີຄົມ, ເຄື່ອງມື ແລະ ເຄື່ອງໃຊ້ໂລຫະທົ່ວໄປ 25991 ການຜະລິດເຫຼັກຕະປູ 25992 ການຜະລິດ ໂລຫະໃຊ້ຄົວເຮືອນ 25999 ການຜະລິດຜະລິດຕະພັນອື່ນໆ 3. ການດຳເນີນການສຶກສາເບື້ອງຕົ້ນກ່ຽວກັບຜົນກະທົບຕໍ່ສິ່ງແວດລ້ອມ ແລະ ປະເມີນຜົນກະທົບຕໍ່ສິ່ງແວດລ້ອມແບບລະອຽດ ອິງໃສ່ຂໍ້ຕົກລົງວ່າດ້ວຍບັນຊີການຈັດແບ່ງກຸ່ມໂຄງການລົງທຶນ ຫຼື ກິດຈະການຕ່າງໆ ໃນການປະເມີນຜົນກະທົບຕໍ່ສິ່ງແວດລ້ອມ ສະບັບເລກທີ 0358/ກຊສ ໂຮງງານອຸດສາຫະກຳປຸງແຕ່ງເຫຼັກ ຕ້ອງດຳເນີນການສຶກສາເບື້ອງຕົ້ນກ່ຽວກັບຜົນກະທົບຕໍ່ສິ່ງແວດລ້ອມ ແລະ ຕ້ອງດຳເນີນການປະເມີນຜົນກະທົບຕໍ່ສິ່ງແວດລ້ອມແບບລະອຽດ ດັ່ງນີ້: ໂຮງງານຜະລິດເຫຼັກຂັ້ນຕົ້ນ ແລະ ເຫຼັກກ້າທີ່ມີກຳລັງການຜະລິດ 3,000 – 5,000 ໂຕນ/ປີ ຕ້ອງດຳເນີນການສຶກສາເບື້ອງຕົ້ນກ່ຽວກັບຜົນກະທົບຕໍ່ສິ່ງແວດລ້ອມ ໂຮງງານຜະລິດເຫຼັກຂັ້ນຕົ້ນ ແລະ ເຫຼັກກ້າທີ່ມີກຳລັງການຜະລິດຫຼາຍກວ່າ 5,000 ໂຕນ/ປີ ຕ້ອງດຳເນີນການປະເມີນຜົນກະທົບຕໍ່ສິ່ງແວດລ້ອມແບບລະອຽດ ອິງໃສ່ຂໍ້ຕົກລົງວ່າດ້ວຍການຈັດລະດັບຄວາມສ່ຽງຜົນກະທົບດ້ານສິ່ງແວດລ້ອມຂອງໂຮງງານອຸດສາຫະກຳປຸງແຕ່ງ ສະບັບເລກທີ 0948/ອຄ ໂຮງງານອຸດສາຫະກຳປຸງແຕ່ງເຫຼັກຖືກກຳນົດວ່າເປັນໂຮງງານອຸດສາຫະກຳປຸງແຕ່ງທີ່ມີຜົນກະທົບຕໍ່ສິ່ງແວດລ້ອມໃນລະດັບປານກາງ ແລະ ສູງຕາມເງື່ອນໄຂດັ່ງຕໍ່ໄປນີ້: ໂຮງງານອຸດສາຫະກຳປຸງແຕ່ງເຫຼັກດັ່ງກ່າວຕ້ອງຈັດຕັ້ງປະຕິບັດການຄຸ້ມຄອງສິ່ງແວດລ້ອມດັ່ງນີ້: ໂຮງງານທີ່ມີຄວາມສ່ຽງຜົນກະທົບສິ່ງແວດລ້ອມໃນລະດັບປານກາງ ຕ້ອງສ້າງແຜນການຄຸ້ມຄອງດ້ານສິ່ງແວດລ້ອມ ແລະ ຕິດຕາມເປັນແຕ່ລະໄລຍະ ແລະ ຕ້ອງມີເຂດກັນຊົນບໍ່ຫຼຸດສິບແມັດ ໂຮງງານທີ່ມີຄວາມສ່ຽງຜົນກະທົບສິ່ງແວດລ້ອມໃນລະດັບສູງ ຕ້ອງໄດ້ເຮັດການປະເມີນຜົນກະທົບຕໍ່ສິ່ງແວດລ້ອມ, ຕ້ອງສ້າງແຜນການຄຸ້ມຄອງດ້ານສິ່ງແວດລ້ອມຢ່າງເຂັ້ມງວດ ແລະ ຕິດຕາມເປັນປະຈຳ ແລະ ຕ້ອງມີເຂດກັນຊົນບໍ່ຫຼຸດຊາວແມັດ ຕາມແຕ່ລະກໍລະນີ 4. ຕົວຢ່າງຂະບວນການຜະລິດຂອງໂຮງງານອຸດສາຫະກຳປຸງແຕ່ງເຫຼັກ 4.1. ຕົວຢ່າງຂະບວນການຫຼອມເຫຼັກ ໝາຍເຫດ: ຕົວເລກ 6 ຕົວ ໝາຍເຖິງລະຫັດສິ່ງເສດເຫຼືອຕາມລະບົບຂອງ European Waste Catalogue 4.2. ຕົວຢ່າງຂະບວນລີດ, ດຶງເຫຼັກ ໝາຍເຫດ: ຕົວເລກ 6 ຕົວ ໝາຍເຖິງລະຫັດສິ່ງເສດເຫຼືອຕາມລະບົບຂອງ European Waste Catalogue 5. ມົນລະພິດທີ່ເກີດຂື້ນຈາກການປະກອບກິດຈະການ 5.1. ມົນລະພິດທາງອາກາດ 5.2. ນ້ຳເປື້ອນ ແລະ ສິ່ງເສດເຫຼືອປະເພດທາດແຫຼວ 5.3. ສິ່ງເສດເຫຼືອປະເພດທາດແຂງ 6. ໜ່ວຍຄຸ້ມຄອງສິ່ງແວດລ້ອມ ແລະ ເຄມີປະຈຳໂຮງງານ ອິງໃສ່ຂໍ້ຕົກລົງວ່າດ້ວຍການສ້າງໜ່ວຍງານຄຸ້ມຄອງສິ່ງແວດລ້ອມ ແລະ ເຄມີປະຈຳໂຮງງານສະບັບເລກທີ 1155/ອຄ ໄດ້ກຳນົດໃຫ້ໂຮງງານອຸດສາຫະກຳຫຼອມເຫຼັກທີ່ມີຄວາມສາມາດຜະລິດ 50 ໂຕນ/ມື້ ຫຼຶ ຫຼາຍກວ່າ (ໂຮງງານທີ່ນຳໃຊ້ຄວາມຮ້ອນຈາກເຕົາ (Furnace) ຫຼື ຫຼອມເຫຼັກທີ່ມີຄວາມສາມາດຜະລິດ 5 ໂຕນ/ໝໍ້ ຫຼື ຫຼາຍກວ່າ) ຕ້ອງມີວິຊາການຄຸ້ມຄອງສິ່ງແວດລ້ອມ ແລະ ເຄມີປະຈຳໂຮງງານ 7. ການຕິດຕາມກວດກາຄຸນນະພາບສິ່ງແວດລ້ອມ ອິງໃສ່ຂໍ້ຕົກລົງວ່າດ້ວຍ ມາດຕະຖານອາດທີ່ປ່ອຍອອກຈາກໂຮງງານອຸດສາຫະກຳປຸງແຕ່ງ ສະບັບເລກທີ 2062/ອຄ ໂຮງງານຕ້ອງກວດກາວັດແທກທາດອາຍພິດທີ່ປ່ອຍອອກຈາກໂຮງງານອຸດສາຫະກຳຂອງຕົນເອງ ຢ່າງໜ້ອຍປີລະ 2 ຄັ້ງ. ອິງໃສ່ຂໍ້ກຳນົດກ່ຽວກັບການປ່ອຍນ້ຳເປື້ອນ ແລະ ນ້ຳເສຍຄຸນອອກຈາກໂຮງງານອຸດສາຫະກຳປຸງແຕ່ງ ສະບັບເລກທີ 326/ອຫ ໂຮງງານຕ້ອງກວດກາ ແລະ ວິໄຈຄຸນນະພາບນ້ຳເປື້ອນເປັນປະຈຳ ແລະ ລາຍງານຜົນວິໄຈຕໍ່ກົມອຸດສາຫະກຳ ແລະ ພະແນກອຸດສາຫະກຳ ແລະ ການຄ້າແຂວງທຸກໆ 3 ເດືອນ. ອິງໃສ່ຂໍ້ຕົກລົງວ່າດ້ວຍມາດຕະຖານສຽງດັງ, ແສງສະຫວ່າງ ແລະ ອຸນຫະພູມ ສຳລັບໂຮງງານອຸດສາຫະກຳປຸງແຕ່ງ ແລະ ຫັດຖະກຳ ສະບັບເລກທີ 0168/ອຄ ໄດ້ກຳນົດຄວາມຖີ່ໃນການຕິດຕາມກວດກາສະພາບແວດລ້ອມໃນການເຮັດວຽກດັ່ງຕໍ່ໄປນີ້: 1. ໂຮງງານຜະລິດ ແລະ ສ້ອມແປງຜະລິດຕະພັນທີ່ເຮັດດ້ວຍເຫຼັກ, ເຫຼັກກ້າ ແລະ ໂຮງງານປະກອບກິດຈະການກ່ຽວກັບຜະລິດຕະພັນໂລຫະ ແລະ ອະໂລຫະ ເປັນໂຮງງານອຸດສາຫະກຳສະເພາະ ຕ້ອງໄດ້ວັດແທກສຽງດັງຢ່າງໜ້ອຍ 2 ຄັ້ງ/ປີ; 2. ໂຮງງານຫຼອມ, ດຶງ, ຮີດເຫຼັກ, ໂລຫະມີສີ ແລະ ອະໂລຫະ ແລະ ໂຮງງານຜະລິດ, ຕົບແຕ່ງ, ດັດແປງເຄື່ອງມື, ອຸປະກອນ, ຊິ້ນສ່ວນ ແລະ ເຄື່ອງໃຊ້ຕ່າງໆ ທີ່ເຮັດດ້ວຍເຫຼັກ, ເຫຼັກກ້າ ແລະ ໂລຫະອື່ນໆ ຕ້ອງໄດ້ວັດແທກອຸນຫະພຸມຢ່າງໜ້ອຍ 2 ຄັ້ງ/ປີ. ອ້າງອີງຈາກ: 1. ຂໍ້ຕົກລົງ ວ່າດ້ວຍມາດຕະຖານໂຮງງານອຸດສາຫະກຳປຸງແຕ່ງເຫຼັກ ເລກທີ 2074/ອຄ download 2. ຂໍ້ຕົກລົງ ບັນຊີການປະເມີນຜົນກະທົບຕໍ່ສິ່ງແວດລ້ອມ ເລກທີ 0358/ກຊສ download 3. ກົດໝາຍ ວ່າດ້ວຍອຸດສາຫະກຳປຸງແຕ່ງ ເລກທີ 28/ສພຊ download 4. EHS Guidelines for Metal, Plastic, and rubber products manufacturing download 5. ຂໍ້ຕົກລົງວ່າດ້ວຍການສ້າງໜ່ວຍງານຄຸ້ມຄອງສິ່ງແວດລ້ອມ ແລະ ເຄມີປະຈຳໂຮງງານ ເລກທີ 1155/ອຄ download 6. ຂໍ້ຕົກລົງວ່າດ້ວຍ ມາດຕະຖານອາດທີ່ປ່ອຍອອກຈາກໂຮງງານອຸດສາຫະກຳປຸງແຕ່ງ ສະບັບເລກທີ 2062/ອຄ download 7. ຂໍ້ກຳນົດກ່ຽວກັບການປ່ອຍນ້ຳເປື້ອນ ແລະ ນ້ຳເສຍຄຸນອອກຈາກໂຮງງານອຸດສາຫະກຳປຸງແຕ່ງ ສະບັບເລກທີ 326/ອຫ download 8. ຂໍ້ຕົກລົງວ່າດ້ວຍມາດຕະຖານສຽງດັງ, ແສງສະຫວ່າງ ແລະ ອຸນຫະພູມ ສຳລັບໂຮງງານອຸດສາຫະກຳປຸງແຕ່ງ ແລະ ຫັດຖະກຳ ສະບັບເລກທີ 0168/ອຄ download

Uniform Waste Manifest ແມ່ນຫຍັງ?

August 31, 2023 yoyo ຂໍ້ມູນວິຊາການ, ການນຳໃຊ້ລະບົບຕິດຕາມການຂົນສົ່ງສິ່ງເສດເຫຼືອ (Manifest System)

Uniform Waste Manifest ແມ່ນຫຍັງ? Manifest ຄື ເອກະສານຕິດຕາມການຂົນສົ່ງສິ່ງເສດເຫຼືອ ໝາຍເຖິງ ເອກະສານທີ່ອອກໃຫ້ຜູ້ສ້າງສິ່ງເສດເຫຼືອ (Waste Generator), ຜູ້ຂົນສົ່ງສິ່ງເສດເຫຼືອ (Waste Transporter) ແລະ ຜູ້ບໍາບັດ-ກໍາຈັດສິ່ງເສດເຫຼືອ (Waste Disposal) ເພື່ອເປັນຫຼັກຖານໃນການມອບ-ຮັບສິ່ງເສດເຫຼືອທີ່ຢູ່ໃນການຄຸ້ມຄອງຂອງຕົວເອງຈາກບ່ອນໜື່ງໄປຫາບ່ອນອື່ນ Uniform Waste Manifest ໃນລະບົບຕິດຕາມການຂົນສົ່ງສິ່ງເສດເຫຼືອ manifest system ຂອງ EMAC ປະກອບດ້ວຍ 4 ພາກສ່ວນຄື 1. ພາກສ່ວນທີ 1 : ຫົວເອກະສານ 1.1 ຊື່ເອກະສານ: ໃບຕິດຕາມການຂົນສົ່ງສິ່ງເສດເຫຼືອ / UNFORM WASTE MANIFEST 1.2 ສະຖານະໃບຕິດຕາມການຂົນສົ່ງ / MANIFEST STATUS: ໝາຍເຖິງສະຖານະປະຈຸບັນຂອງເອກະສານເຊິ່ງແຕ່ລະສະຖານະມີຄວາມໝາຍດັ່ງນີ້: Draft ໝາຍເຖິງ ກຳລັງລໍຖ້າການກວດກາຄວາມຖືກຕ້ອງ ແລະ ຄົບຖ້ວນຂອງເອກະສານ Requested ໝາຍເຖິງ ກວດກາຄວາມຖືກຕ້ອງແລ້ວ ແລະ ລໍຖ້າການຕອບຮັບການຂົນສົ່ງ ແລະ ບຳບັດ-ກໍາຈັດຈາກ WT ແລະ WD ທີ່ຖືກລະບຸໄວ້ໃນເອກະສານ Ready ໝາຍເຖິງ WT ແລະ WD ຕອບຮັບການຂົນສົ່ງ ແລະ ບຳບັດ-ກໍາຈັດແລ້ວ ລໍຖ້າເຮັດການຂົນສົ່ງ Processing ໝາຍເຖິງ WT ກຳລັງຂົນສົ່ງສິ່ງເສດເຫຼືອ Completed ໝາຍເຖິງ WD ກວດຮັບສິ່ງເສດເຫຼືອ ແລະ ຊັ່ງນ້ຳໜັກຮຽບຮ້ອຍແລ້ວ Certified ໝາຍເຖິງ ຜູ້ຕິດຕາມກວດກາ (Waste Regulator ຫຼື WR) ກໍ່ຄືໜ່ວຍງານພາກລັດໄດ້ຢັ້ງຢືນການຂົນສົ່ງ ແລະ ບັນທຶກຂໍ້ມູນລົງໃນລະບົບແລ້ວ 1.3 ປະເພດໃບຕິດຕາມການຂົນສົ່ງ / MANIFEST TYPE: ປະເພດໃບຕິດຕາມການຂົນສົ່ງມີຢູ່ 2 ປະເພດຄື: ໃບຕິດຕາມການຂົນສົ່ງສິ່ງເສດເຫຼືອເປັນພິດອັນຕະລາຍ ຈະສະແດງໃນເອກະສານເປັນ HAZARDOUS ແລະ ໃບຕິດຕາມການຂົນສົ່ງສິ່ງເສດເຫຼືອບໍ່ເປັນພິດອັນຕະລາຍ ຈະສະແດງໃນເອກະສານເປັນ NON- HAZARDOUS 1.4 ເລກທີໃບຕິດຕາມການຂົນສົ່ງ / MANIFEST NO.: ເລກທີໃບຕິດຕາມການຂົນສົ່ງສິ່ງເສດເຫຼືອເປັນພິດອັນຕະລາຍ ແລະ ບໍ່ເປັນພິດອັນຕະລາຍຈະຂື້ນຕົ້ນດ້ວຍ H ແລະ N ຕາມລະດັບ, ປີໃນການຂົນສົ່ງ ແລະ ລຳດັບໃນການຂົນສົ່ງຂອງປີນັ້ນໆ 1.5 ວັນທີສ້າງໃບຕິດຕາມການຂົນສົ່ງ / REQUEST DATE: ໝາຍເຖິງ ວັນທີສ້າງໃບຕິດຕາມການຂົນສົ່ງໃນລະບົບ Manifest System 1.6 ວັນທີເຮັດການຂົນສົ່ງ / MANIFEST DATE: ໝາຍເຖິງ ວັນທີເລີ່ມເຮັດການຂົນສົ່ງ 2. ພາກສ່ວນທີ 2 : ສ່ວນຂອງຜູ້ສ້າງສິ່ງເສດເຫຼືອ / Waste Generator 2.1 ເລກປະຈຳຕົວຜູ້ຄອບຄອງສິ່ງເສດເຫຼືອ / EMC ID: ໝາຍເຖິງເລກປະຈຳຕົວຢູ່ທີ່ກ່ຽວຂ້ອງກັບການຄຸ້ມຄອງ ປະກອບດ້ວຍຕົວເລກ ແລະ ຕົວອັກສອນ 13 ຫຼັກ ເຊິ່ງມີຄວາມໝາຍດັ່ງຕໍ່ໄປນີ້: ລຳດັບທີ 1-3: ອັກສອນພາສາອັງກິດ “EMC” ຫຍໍ້ມາຈາກ Environmental Management Academic center (EMAC) ລຳດັບທີ 4: ອັກສອນພາສາອັງກິດ “G” ຫຍໍ້ມາຈາກ Generator ລຳດັບທີ 5-6: ຕົວເລກ 2 ຕົວທ້າຍຂອງປີ ເຊັ່ນ: 23 ສຳລັບປີ 2023 ລຳດັບທີ 7-9: ຕົວເລກລະຫັດທີ່ຕັ້ງ ລຳດັບທີ 10-12: ເລກລຳດັບການຂື້ນທະບຽນນຳໃຊ້ໃນປີນັ້ນໆ ລຳດັບທີ 13: ລະຫັດສະເພາະສຳລັບຜູ້ປະກອບການພາຍໃນເຂດເສດຖະກິດພິເສດ ແລະ ເຂດເສດຖະກິດສະເພາະ 2.2 ຂໍ້ມູນຜູ້ສ້າງສິ່ງເສດເຫຼືອ: ປະກອບດ້ວຍຂໍ້ມູນຊື່ວິສາຫະກິດ, ທີ່ຕັ້ງ, ເບີໂທ ແລະ ອີເມວຕິດຕໍ່ 2.3 ລະຫັດສິ່ງເສດເຫຼືອ / Waste Code: ລະຫັດສິ່ງເສດເຫຼືອຕາມການຈັດແບ່ງຂອງສະຫະພາບເອີລົບ The European List of Wastes (LoW) 2.4 ລາຍລະອຽດສິ່ງເສດເຫຼືອ / Waste Description: ຊື່ຂອງສິ່ງເສດເຫຼືອ 2.5 ຈຳນວນ / Quantity: ຈຳນວນຄາດຄະເນສິ່ງເສດເຫຼືອທີ່ຈະເຮັດການຂົນສົ່ງອອກໄປບຳບັດ-ກຳຈັດພາຍນອກ ເຊັ່ນ: ຖັງ 20 ລິດຂື້ນໄປ ຈໍານວນ 30 ຖັງ, ຖັງຂີ້ເຫຍື້ອຈຳນວນ 6 ຖັງ 2.6 ປະເພດບັນຈຸ / Container type: ປະເພດພາຊະນະບັນຈຸສິ່ງເສດເຫຼືອ ເຊັ່ນ: ຖັງ 200 ລິດ, ຖັງແກລລອນຂະໜາດນ້ອຍ, ຖັງ 1,000 ລິດ, ກອງ ຫຼື ພາເລດ ແລະ ອື່ນໆ 2.7 ປະລິມານຄາດຄະເນ / Approximate weight: ປະລິມານຄາດຄະເນສິ່ງເສດເຫຼືອທີ່ຈະເຮັດການຂົນສົ່ງອອກໄປບຳບັດ-ກຳຈັດພາຍນອກ ຫົວໜ່ວຍເປັນ kg 2.8 ສະຖານະສິ່ງເສດເຫຼືອ / Type of waste: ສະຖານະຂອງສິ່ງເສດເຫຼືອ ຄື: ທາດແຂງ ແລະ ທາດແຫຼວ 2.9 ປະລິມານຄາດຄະເນລວມ / Total approximate weight ປະລິມານຄາດຄະເນສິ່ງເສດເຫຼືອລວມທັງໝົດທຸກລາຍການທີ່ຈະເຮັດການຂົນສົ່ງອອກໄປບຳບັດ-ກຳຈັດພາຍນອກ ຫົວໜ່ວຍເປັນ kg 2.10 ຂໍ້ມູນການຂົນສົ່ງສິ່ງເສດເຫຼືອໃຫ້ WT: ປະກອບດ້ວຍຊື່ ແລະ ນາມສະກຸນຂອງຜູ້ນຳໃຊ້ລະບົບ Manifest system ຂອງ WG, ວັນທີທີ່ສົ່ງມອບສິ່ງເສດເຫຼືອໃຫ້ WT ແລະ QR Code ຢັ້ງຢືນການສົ່ງມອບສິ່ງເສດເຫຼືອດັ່ງກ່າວ 3. ພາກສ່ວນທີ 3 : ສ່ວນຂອງຜູ້ຂົນສົ່ງສິ່ງເສດເຫຼືອ / Waste Transporter 3.1 ເລກປະຈຳຕົວຜູ້ຄອບຄອງສິ່ງເສດເຫຼືອ / EMC ID: ໝາຍເຖິງເລກປະຈຳຕົວຢູ່ທີ່ກ່ຽວຂ້ອງກັບການຄຸ້ມຄອງ ປະກອບດ້ວຍຕົວເລກ ແລະ ຕົວອັກສອນ 13 ຫຼັກ ເຊິ່ງມີຄວາມໝາຍດັ່ງຕໍ່ໄປນີ້: ລຳດັບທີ 1-3: ອັກສອນພາສາອັງກິດ “EMC” ຫຍໍ້ມາຈາກ Environmental Management Academic center (EMAC) ລຳດັບທີ 4: ອັກສອນພາສາອັງກິດ “T” ຫຍໍ້ມາຈາກ Transporter ລຳດັບທີ 5-6: ຕົວເລກ 2 ຕົວທ້າຍຂອງປີ ເຊັ່ນ: 23 ສຳລັບປີ 2023 ລຳດັບທີ 7-9: ຕົວເລກລະຫັດທີ່ຕັ້ງ ລຳດັບທີ 10-12: ເລກລຳດັບການຂື້ນທະບຽນນຳໃຊ້ໃນປີນັ້ນໆ ລຳດັບທີ 13: ລະຫັດປະເພດຜູ້ຂົນສົ່ງສິ່ງເສດເຫຼືອ 3.2 ຂໍ້ມູນຜູ້ຂົນສົ່ງສິ່ງເສດເຫຼືອ: ປະກອບດ້ວຍຂໍ້ມູນຊື່ວິສາຫະກິດ, ທີ່ຕັ້ງ, ເບີໂທ ແລະ ອີເມວຕິດຕໍ່ 3.3 ປະເພດພາຫະນະ / Vehicle Type: ປະເພດພາຫະນະທີ່ນຳໃຊ້ເຂົ້າໃນການຂົນສົ່ງເຊັ່ນ: ລົດບັນທຸກ 6 ລໍ້, ລົດບັນທຸກ 10 ລໍ້ ແລະ ອື່ນໆ 3.4 ຊື່ຄົນຂັບ / Driver name: ຜູ້ເຮັດການຂົນສົ່ງສິ່ງເສດເຫຼືອ 3.5 ປ້າຍລົດ / License plate: ປ້າຍລົດທີ່ໃຊ້ໃນການຂົນສົ່ງ 3.6 Security seal: ເປັນເຄື່ອງມືສຳລັບລັອກຕູ້ຄອນເທນເນີ ຫຼື ລົດບັນທຸກ ເພື່ອເພີ່ມຄວາມປອດໄພ ແລະ ປ້ອງກັນການລັກຖີ້ມສິ່ງເສດເຫຼືອຊະຊາຍໃນລະຫວ່າງຂົນສົ່ງ ເຊີ່ງຈະມີລະຫັດຕົວເລກລະບຸໃນຊິວແຕ່ລະອັນ (ຖ້າມີ) 3.7 GPS Number: ເລກທີຂອງ GPS Tracker ອຸປະກອນສຳລັບຕິດຕັ້ງກັບພາຫະນະເພື່ອໃຊ້ຕິດຕາມຕຳແໜ່ງ ແລະ ການເຄື່ອນທີ່ (ຖ້າມີ) 3.8 ຂໍ້ມູນການຮັບສິ່ງເສດເຫຼືອຂອງ WT: ປະກອບດ້ວຍຊື່ ແລະ ນາມສະກຸນຂອງຜູ້ນຳໃຊ້ລະບົບ Manifest system ຂອງ WT, ວັນທີທີ່ຮັບສິ່ງເສດເຫຼືອຈາກ WG ແລະ QR Code ຢັ້ງຢືນການຮັບ ສິ່ງເສດເຫຼືອດັ່ງກ່າວ 4. ພາກສ່ວນທີ 4 : ສ່ວນຂອງຜູ້ບຳບັດ-ກຳຈັດສິ່ງເສດເຫຼືອ / Waste Disposal 4.1 ເລກປະຈຳຕົວຜູ້ຄອບຄອງສິ່ງເສດເຫຼືອ / EMC ID: ໝາຍເຖິງເລກປະຈຳຕົວຢູ່ທີ່ກ່ຽວຂ້ອງກັບການຄຸ້ມຄອງ ປະກອບດ້ວຍຕົວເລກ ແລະ ຕົວອັກສອນ 13 ຫຼັກ ເຊິ່ງມີຄວາມໝາຍດັ່ງຕໍ່ໄປນີ້: ລຳດັບທີ 1-3: ອັກສອນພາສາອັງກິດ “EMC” ຫຍໍ້ມາຈາກ Environmental Management Academic center (EMAC) ລຳດັບທີ 4: ອັກສອນພາສາອັງກິດ “D” ຫຍໍ້ມາຈາກ Disposal ລຳດັບທີ 5-6: ຕົວເລກ 2 ຕົວທ້າຍຂອງປີ ເຊັ່ນ: 23 ສຳລັບປີ 2023 ລຳດັບທີ 7-9: ຕົວເລກລະຫັດທີ່ຕັ້ງ ລຳດັບທີ 10-12: ເລກລຳດັບການຂື້ນທະບຽນນຳໃຊ້ໃນປີນັ້ນໆ ລຳດັບທີ 13: ລະຫັດປະເພດຜູ້ບຳບັດ-ກຳຈັດສິ່ງເສດເຫຼືອ 4.2 ຂໍ້ມູນຜູ້ບຳບັດ-ກຳຈັດສິ່ງເສດເຫຼືອ: ປະກອບດ້ວຍຂໍ້ມູນຊື່ວິສາຫະກິດ, ທີ່ຕັ້ງ, ເບີໂທ ແລະ ອີເມວຕິດຕໍ່ 4.3 ລະຫັດສິ່ງເສດເຫຼືອ / Waste Code: ລະຫັດສິ່ງເສດເຫຼືອຕາມການຈັດແບ່ງຂອງສະຫະພາບເອີລົບ The European List of Wastes (LoW) 4.4 ລາຍລະອຽດສິ່ງເສດເຫຼືອ / Waste Description: ຊື່ຂອງສິ່ງເສດເຫຼືອ 4.5 ຈຳນວນ / Quantity: ຈຳນວນສິ່ງເສດເຫຼືອທີ່ຜູ້ບຳບັດ-ກຳຈັດສິ່ງເສດເຫຼືອຮັບຈາກ WT ເຊັ່ນ: ຖັງ 20 ລິດຂື້ນໄປ ຈໍານວນ 30 ຖັງ, ຖັງຂີ້ເຫຍື້ອຈຳນວນ 6 ຖັງ 4.6 ປະເພດບັນຈຸ / Container type: ປະເພດພາຊະນະບັນຈຸສິ່ງເສດເຫຼືອ ເຊັ່ນ: ຖັງ 200 ລິດ, ຖັງແກລລອນຂະໜາດນ້ອຍ, ຖັງ 1,000 ລິດ, ກອງ ຫຼື ພາເລດ ແລະ ອື່ນໆ 4.7 ນ້ຳໜັກ / Weight: ນ້ຳໜັກສິ່ງເສດເຫຼືອທີ່ຜູ້ບຳບັດ-ກຳຈັດສິ່ງເສດເຫຼືອຮັບຈາກ WT ຫົວໜ່ວຍເປັນ kg 4.8 ສະຖານະສິ່ງເສດເຫຼືອ / Type of waste: ສະຖານະຂອງສິ່ງເສດເຫຼືອ ຄື: ທາດແຂງ ແລະ ທາດແຫຼວ 4.9 ລະຫັດກຳຈັດ ແລະ ບຳບັດ / R&D Code: ລະຫັດບຳບັດ-ກຳຈັດ ທີ່ລະບຸໄວ້ໃນ ເອກະສານຊ້ອນທ້າຍທີ 3 ຂອງບົດແນະນຳກ່ຽວກັບການຄຸ້ມຄອງສິ່ງເສດເຫຼືອເປັນພິດ ແລະ ອັນຕະລາຍ ເລກທີ 0744/ກຊສ, ລົງວັນທີ 11 ກຸມພາ 2015 4.10 ນ້ຳໜັກລວມ / Total: ນ້ຳໜັກສິ່ງເສດເຫຼືອລວມທັງໝົດທຸກລາຍການທີ່ຜູ້ບຳບັດ-ກຳຈັດສິ່ງເສດເຫຼືອຮັບຈາກ WT ຫົວໜ່ວຍເປັນ kg 4.11 ຂໍ້ມູນການຮັບສິ່ງເສດເຫຼືອຈາກ WT: ປະກອບດ້ວຍຊື່ ແລະ ນາມສະກຸນຂອງຜູ້ນຳໃຊ້ລະບົບ Manifest system ຂອງ WD, ວັນທີທີ່ WD ຮັບສິ່ງເສດເຫຼືອຈາກ WT ແລະ QR Code ຢັ້ງຢືນການຮັບສິ່ງເສດເຫຼືອດັ່ງກ່າວ 5. ພາກສ່ວນທີ 5 : ສ່ວນຂອງຜູ້ຕິດຕາມກວດກາ / Waste Regulator 5.1 ເລກປະຈຳຕົວຜູ້ຄອບຄອງສິ່ງເສດເຫຼືອ / EMC ID: ໝາຍເຖິງເລກປະຈຳຕົວຢູ່ທີ່ກ່ຽວຂ້ອງກັບການຄຸ້ມຄອງ ປະກອບດ້ວຍຕົວເລກ ແລະ ຕົວອັກສອນ 13 ຫຼັກ ເຊິ່ງມີຄວາມໝາຍດັ່ງຕໍ່ໄປນີ້: ລຳດັບທີ 1-3: ອັກສອນພາສາອັງກິດ “EMC” ຫຍໍ້ມາຈາກ Environmental Management Academic center (EMAC) ລຳດັບທີ 4: ອັກສອນພາສາອັງກິດ “R” ຫຍໍ້ມາຈາກ Regulator ລຳດັບທີ 5-6: ຕົວເລກ 2 ຕົວທ້າຍຂອງປີ ເຊັ່ນ: 23 ສຳລັບປີ 2023 ລຳດັບທີ 7-9: ຕົວເລກລະຫັດທີ່ຕັ້ງ ລຳດັບທີ 10-12: ເລກລຳດັບການຂື້ນທະບຽນນຳໃຊ້ໃນປີນັ້ນໆ ລຳດັບທີ 13: ລະຫັດປະເພດຜູ້ຕິດຕາມກວດກາຈາກໜ່ວຍງານພາກລັດຕ່າງໆ 5.2 ຂໍ້ມູນການຢັ້ງຢືນການຂົນສົ່ງຂອງ WR: ປະກອບດ້ວຍຊື່ ແລະ ນາມສະກຸນຂອງຜູ້ຕິດຕາມກວດກາ (WR) ໃນລະບົບ Manifest system, ວັນທີ ແລະ QR Code ຢັ້ງຢືນການຂົນສົ່ງ ແລະ ບັນທຶກຂໍ້ມູນລົງໃນລະບົບ 6. ພາກສ່ວນທີ 6 : ສ່ວນທ້າຍເອກະສານ ທ້າຍເອກະສານຈະລະບຸຊື່ຂອງຜູ້ດາວໂຫລດເອກະສານຕິດຕາມການຂົນສົ່ງອອກມາຈາກລະບົບ Manifest system ຂອງ EMAC ແລະ ວັນທີ-ເວລາໃນການດາວໂຫລດເອກະສານດັ່ງກ່າວ. File ເອກະສານ ດາວໂຫລດ

ມາດຕະການປັບໃໝກ່ຽວກັບການຄຸ້ມຄອງສິ່ງແວດລ້ອມ ແລະ ຄວາມປອດໄພ

August 25, 2023 yoyo ຂ່າວປະຊາສຳພັນ

ມາດຕະການປັບໃໝກ່ຽວກັບການຄຸ້ມຄອງສິ່ງແວດລ້ອມ ແລະ ຄວາມປອດໄພ ອິງຕາມການສະເໜີຂອງກົມອຸດສາຫະກຳ ແລະ ຫັດຖະກຳ ກະຊວງອຸດສາຫະກຳ ແລະ ການຄ້າ ໄດ້ອອກ ຂໍ້ຕົກລົງວ່າດ້ວຍມາດຕະການປັບໃໝຕໍ່ຜູ້ລະເມີດລະບຽບການດຳເນີນກິດຈະການໂຮງງານ ສະບັບເລກທີ 1233/ອຄ, ລົງວັນທີ 2 ສິງຫາ 2023 ໂດຍມີຈຸດປະສົງເພື່ອກຳນົດຫຼັກການ, ລະບຽບການ ແລະ ມາດຕະຖານ ກ່ຽວກັບການປັບໄໝ ຕໍ່ຜູ້ລະເມີດລະບຽບການດຳເນີນກິດຈະການໂຮງງານ ເພື່ອເປັນບ່ອນອີງໃຫ້ແກ່ເຈົ້າໜ້າທີ່ ໃນການນຳໃຊ້ມາດຕະການປັບໃໝຕໍ່ຜູ້ລະເມີດ ຢ່າງຖືກຕ້ອງ, ເຂັ້ມງວດ ແລະ ເປັນເອກະພາບ ໃນຂອບເຂດທົ່ວໄປເທດ ແນ່ໃສ່ເຮັດໃຫ້ການດຳເນີນກິດຈະການໂຮງງານ ຖຶກຕ້ອງຕາມກົດໝາຍ ແລະ ລະບຽບການ ເຊິ່ງຂໍ້ຕົກລົງດັ່ງກ່າວໄດ້ກຳນົດມາດຕະການປັບໃໝ່ກ່ຽວກັບການຄຸ້ມຄອງສິ່ງແວດລ້ອມ ແລະ ຄວາມປອດໄພດັ່ງຕໍ່ໄປນີ້: 1.ນຳເຂົ້າ ຫຼື ນຳໃຊ້ເຄມີອັນຕະລາຍຢູ່ໃນໂຮງງານ ໂດຍບໍ່ໄດ້ຮັບອະນຸຍາດ ຈະຖືກຍຶດເຄມີອັນຕະລາຍ ພ້ອມທັງປັບໃໝ ດັ່ງນີ້: ໂຮງງານຂະໜາດນ້ອຍ ຈະຖືກປັບໃໝ 5,000,000 ກີບ/ຄັ້ງ; ໂຮງງານຂະໜາດກາງ ຈະຖືກປັບໃໝ 10,000,000 ກີບ/ຄັ້ງ; ໂຮງງານຂະໜາດໃຫຍ່ ຈະຖືກປັບໃໝ 15,000,000 ກີບ/ຄັ້ງ; 2. ກໍ່ສ້າງ, ດັດແກ້ ຫຼື ຕິດຕັ້ງເຄື່ອງຈັກ ລະບົບບຳບັດສິ່ງເສດເຫຼືອກ່ອນໄດ້ຮັບໃບຢັ້ງຢືນດ້ານເຕັກນິກກ່ຽວກັບລະບົບບຳບັດສິ່ງເສດເຫຼືອ ຈະຖືກປັບໃໝ ດັ່ງນີ້: ໂຮງງານຂະໜາດນ້ອຍ ຈະຖືກປັບໃໝ 3,000,000 ກີບ/ຄັ້ງ; ໂຮງງານຂະໜາດກາງ ຈະຖືກປັບໃໝ 5,000,000 ກີບ/ຄັ້ງ; ໂຮງງານຂະໜາດໃຫຍ່ ຈະຖືກປັບໃໝ 7,000,000 ກີບ/ຄັ້ງ; 3. ປ່ອຍມົນລະພິດ ຫຼື ຖີ້ມສິ່ງເສດເຫຼືອ ທີ່ບໍ່ໄດ້ຜ່ານຂະບວນການບຳບັດ ຫຼື ບຳບັດບໍ່ໄດ້ມາດຕະຖານ ຕາມກົດໝາຍ ແລະ ລະບຽບການ ຈະຖືກປັບໃໝ ດັ່ງນີ້: ໂຮງງານຂະໜາດນ້ອຍ, ໂຮງງານແບບຄອບຄົວ ຈະຖືກປັບໃໝ 10,000,000 ກີບ/ຄັ້ງ; ໂຮງງານຂະໜາດກາງ ຈະຖືກປັບໃໝ 15,000,000 ກີບ/ຄັ້ງ; ໂຮງງານຂະໜາດໃຫຍ່ ຈະຖືກປັບໃໝ 20,000,000 ກີບ/ຄັ້ງ; ຖ້າຜູ້ດຳເນີນກິດຈະການໂຮງງານ ຫາກມີພຶດຕິກຳທີ່ເປັນການລະເມີດລະບຽບການດັ່ງກ່າວຄັ້ງທີສອງ ແລະ ຄັ້ງທີສາມ ຈະຖືກປັບໃໝເພີ່ມຕາມແຕ່ລະກໍລະນີ ໂດຍການລະເມີດຄັ້ງທີສອງ ຈະຖືກປັບໃໝ 2 ເທົ່າ ແລະ ລະເມີດຄັ້ງທີສາມ ຈະຖືກປັບໃໝ 5 ເທົ່າ. ເຊິ່ງໃນການຈັດຕັ້ງປະຕິບັດແມ່ນມອບໃຫ້ກົມອຸດສາຫະກຳ ແລະ ຫັດຖະກຳ, ພະແນກອຸດສາຫະກຳ ແລະ ການຄ້າ ແຂວງ, ນະຄອນຫຼວງ, ຫ້ອງການອຸດສາຫະກຳ ແລະ ການຄ້າເມືອງ, ນະຄອນ ປະສານສົມທົບກັບທຸກພາກສ່ວນທີ່ກ່ຽວຂ້ອງ ເພື່ອເຜີຍແຜ່ແນະນຳ ແລະ ຈັດຕັ້ງປະຕິບັດ ດາວໂຫລດ: ຂໍ້ຕົກລົງວ່າດ້ວຍມາດຕະການປັບໃໝຕໍ່ຜູ້ລະເມີດລະບຽບການດຳເນີນກິດຈະການໂຮງງານ ເລກທີ 1233/ອຄ, ລົງວັນທີ 2 ສິງຫາ 2023

ໜ່ວຍງານບໍລິການບຳບັດ-ກຳຈັດສິ່ງເສດເຫຼືອ

August 25, 2023 yoyo ໜ່ວຍງານ

ໜ່ວຍງານບໍລິການບຳບັດ-ກຳຈັດສິ່ງເສດເຫຼືອ ເປັນໜ່ວຍງານຄຸ້ມຄອງສະຖານີຄົ້ນຄວ້າ-ວິໄຈການຄຸ້ມຄອງສິ່ງເສດເຫຼືອອຸດສາຫະກຳ ໂຄງການຕົວແບບການຄຸ້ມຄອງສິ່ງເສດເຫຼືອອຸດສາຫະກຳ ເຊິ່ງເປັນການຮ່ວມມືກັນລະຫວ່າງສູນວິຊາການດ້ານການຈັດການສິ່ງແວດລ້ອມ (EMAC) ກັບໜ່ວຍງານພາກລັດ ຄື: ກົມສິ່ງແວດລ້ອມ ແລະ ກົມອຸດສາຫະກຳ ແລະ ຫັດຖະກຳ ປະຈຸບັນໜ່ວຍງານດັ່ງກ່າວໄດ້ຈັດຕັ້ງປະຕິບັດຕົວຈິງກັບຄູ່ຮ່ວມງານພາກເອກະຊົນຄື: ບໍລິສັດ ສະຫວັນ ອີເອັມຊີ ຈຳກັດ, ບໍລິສັດ ຄຳມ່ວນ ຊີມັງ ຈຳກັດ, ບໍລິສັດ ຄາຢາມາ ໂຄກຽວ ຈຳກັດ ແລະ ກຸ່ມບໍລິສັດວົງພານິດລາວ ເຊິ່ງເປັນຜູ້ບຸກເບີກການໃຫ້ບໍລິການຈັດການສິ່ງເສດເຫຼືອເປັນພິດອັນຕະລາຍພາຍໃນ ສປປ ລາວ ແລະ ເຕັກໂນໂລຊີການບຳບັດ-ກຳຈັດສິ່ງເສດເຫຼືອໂຮງໝໍ ແລະ ສິ່ງເສດເຫຼືອອີເລັກໂຕນິກ ຕາມມາດຕະຖານສາກົນ. ປະເພດສິ່ງເສດເຫຼືອອຸດສາຫະກຳທີ່ຮັບບຳບັດ-ກຳຈັດແບ່ງອອກເປັນ 5 ປະເພດດັ່ງຕໍ່ໄປນີ້: 1. ສິ່ງເສດເຫຼືອອຸດສາຫະກຳປະເພດທາດແຫຼວ ສິ່ງເສດເຫຼືອອຸດສາຫະກຳປະເພດທາດແຫຼວທີ່ບໍ່ມີຄ່າຄວາມຮ້ອນ ເຊັ່ນ: ນ້ຳເປື້ອນຈາກຂະບວນການຜະລິດ, ນ້ຳປົນເປື້ອນສານເຄມີໃດໜື່ງ ຫຼື ນ້ຳຫຼໍ່ເຢັນຈາກລະບົບບຳບັດເປັນຕົ້ນ ສິ່ງເສດເຫຼືອອຸດສາຫະກຳປະເພດທາດແຫຼວທີ່ມີຄ່າຄວາມຮ້ອນ ເຊັ່ນ: ສານລະລາຍທີ່ສາມາດຈຸດຕິດໄຟ, ນ້ຳມັນເກົ່າ, ນ້ຳມັນປົນເປື້ອນ, ສານລະລາຍປະສົມທາດເຫຼົ້າເປັນຕົ້ນ 2. ສິ່ງເສດເຫຼືອອຸດສາຫະກຳປະເພດທາດແຂງ ແລະ ຕະກອນ ຫຼື ຂີ້ຕົມ ສິ່ງເສດເຫຼືອອຸດສາຫະກຳທາດແຂງທີ່ສາມາດນຳໃຊ້ເປັນວັດຖຸດິບທົດແທນ (Alternative raw material) ສໍາລັບການຜະລິດຊີມັງ ເຊັ່ນ: ຕະກອນຈາກລະບົບບຳບັດນ້ຳເປື້ອນ, ຝຸ່ນເຫຼັກ, ຂີ້ຊາຍ, ຂີ້ຫິນ ຫຼື ດິນທີ່ປົນເປື້ອນສານເຄມີ. ສິ່ງເສດເຫຼືອອຸດສາຫະກໍາທາດແຂງທີ່ສາມາດນຳໃຊ້ເປັນເຊື້ອໄຟປະສົມ ເຊັ່ນ: ຜ້າປົນເປື້ອນນ້ຳມັນ ຫຼື ສານເຄມີ, ເສດຢາງ ຫຼື ພລາສຕິກ, ເສດໄມ້ ຫຼື ວັດສະດຸປົນເປື້ອນ. 3. ສິ່ງເສດເຫຼືອອຸດສາຫະກຳປະເພດຂອງແຂງ ທີ່ບໍ່ເປັນພິດອັນຕະລາຍ ສິ່ງເສດເຫຼືອທີ່ສາມາດຄັດແຍກເພື່ອສົ່ງຮີໄຊເຄີ້ນໄດ້ (Recyclable material) ເຊັ່ນ: ເສດເຫຼັກ-ກະປ໋ອງ, ແກ້ວ, ເສດໜັງ, ວັດສະດຸ, ເສດເຈ້ຍ-ຖົງຢາງ, ແກັດ-ພາຊະນະ ຫຼື ບັນຈຸພັນ ເປັນຕົ້ນ ສິ່ງເສດເຫຼືອທີ່ບໍ່ສາມາດສົ່ງໃຫ້ຜູ້ຄັດແຍກເພື່ອການລີໄຊເຄີ້ນໄດ້ (Unrecyclable material) ໄດ້ແກ່ ສິ່ງເສດເຫຼືອທີ່ ບໍ່ມີຜູ້ຕ້ອງການນຳໄປແປຮູບ ຫຼື ລີໄຊເຄີ້ນພາຍໃນ ສປປ ລາວ. 4. ສິ່ງເສດເຫຼືອອິເລັກໂຕນິກ (Electronics Waste: E-waste) ສິ່ງເສດເຫຼືອປະເພດຫຼອດໄຟຟ້າ ແລະ ແບັດເຕີລີ້ ສິ່ງເສດເຫຼືອປະເພດຄອມພິວເຕີ ແລະ ອຸປະກອນຄອມພິວເຕີ-ອຸປະກອນສື່ສານ ສິ່ງເສດເຫຼືອປະເພດເຄື່ອງແອເຢັນ, ເຄື່ອງໃຊ້ໄຟຟ້າ ແລະ ເຄື່ອງເອເລັກໂຕນິກ ສິ່ງເສດເຫຼືອປະເພດແຜງໂຊລ່າ, ໝໍ້ໄຟ 5. ສິ່ງເສດເຫຼືອຈາກສະຖານທີ່ບໍລິການສາທາລະນະສຸກ (ໂຮງໝໍ, ສຸກສາລາ, ຫ້ອງກວດພະຍາດເອກະຊົນທົ່ວໄປ, ຫ້ອງວິເຄາະທາງດ້ານການແພດ, ສະຖາບັນ, ຫ້ອງພະຍາບານໃນສະຖານປະກອບການຕ່າງໆ) ເຊັ່ນ: ຂີ້ເຫຍື້ອຕິດເຊື້ອ, ຂີ້ເຫຍື້ອປະເພດຢາ, ຂີ້ເຫຍື້ອເປັນພິດຕໍ່ກຳມະພັນ, ສານເຄມີ ແລະ ຂີ້ເຫຍື້ອທີ່ມີໂລຫະສູງ, ກະປ໋ອງອັດຄວາມດັນ ແລະ ອື່ນໆ ໂດຍສາມາດໃຫ້ບໍລິການໃນການເກັບລວບລວມ, ຂົນສົ່ງ ແລະ ອອກໃບຢັ້ງຢືນການຮັບບຳບັດກຳຈັດໃຫ້ແກ່ ເຈົ້າຂອງສິ່ງເສດເຫຼືອ ພ້ອມອອກໃບຮັບຮອງການທຳລາຍ ເພື່ອປະໂຫຍດທາງດ້ານພາສີ-ອາກອນ ສຳລັບຜູ້ປະກອບການທີ່ໄດ້ຮັບການຍົກເວັ້ນອາກອນນຳເຂົ້າຕາມລະບົບພາສີການສົ່ງເສີມການລົງທຶນ.

ໜ່ວຍບໍລິການຕິດຕາມກວດກາຄຸນນະພາບສິ່ງແວດລ້ອມ

August 24, 2023 yoyo ໜ່ວຍງານ

ໜ່ວຍບໍລິການຕິດຕາມກວດກາຄຸນນະພາບສິ່ງແວດລ້ອມ ເປັນໜ່ວຍງານທີ່ມີພາລະບົດບາດໃນການໃຫ້ຄຳປຶກສາ ແລະ ໃຫ້ບໍລິການຕິດຕາມກວດກາຄຸນນະພາບສິ່ງແວດລ້ອມ ໂດຍມີຂອບເຂດການໃຫ້ບໍລິການດັ່ງນີ້: ກວດກາວັດແທກຄຸນນະພາບນ້ຳ ບໍລິການກວດຄຸນນະພາບນ້ຳປະປາ, ນ້ຳດື່ມ, ນ້ຳກ້ອນ… ຕາມມາດຕະຖານສາກົນ ບໍລິການກວດກາວັດແທກຄຸນນະພາບ ນ້ຳໜ້າດິນ, ນ້ຳໃຕ້ດິນ, ນ້ຳເປື້ອນ ແລະ ອື່ນໆ ກວດກາວັດແທກສະພາບແວດລ້ອມໃນບັນຍາກາດ (Ambient) ຝຸ່ນລະອອງໃນບັນຍາກາດ Total Suspended Particulate (TSP) ຝຸ່ນລະອອງຂະໜາດນ້ອຍໃນບັນຍາກາດ Particulate Matter (PM10, PM5, PM2.5) ອາຍລະເຫີຍຈາກສານເຄມີ ແລະ ກ໊າສຕ່າງໆ (24 Hrs) ເຊັ່ນ: (SOx, NOx, CO, etc.) ທິດທາງ ແລະ ຄວາມໄວຂອງລົມ (Wind speed/Wind direct) ລະດັບສຽງສະເລ່ຍ 24 ຊົ່ວໂມງ (Leq. 24 Hrs) ຄວາມສັ່ນສະເທືອນ (Vibration) ກວດກາວັດແທກຄຸນນະພາບອາກາດຈາກແຫຼ່ງກຳເນີດ (ປ່ອງລະບາຍອາກາດ) Total Suspended particulates (TSP) Sulfur Dioxide (SO2) Oxide of Nitrogen (NOx) Nitrogen Dioxide (NO2) Carbon Monoxide (CO) Ozone (O3) ຄວາມທຶບແສງຂອງປ່ອງ (Opacity) Xylene, Toluene, Ammonia, Hydrogen Peroxide, Nitric acid ກວດກາວັດແທກຄຸນນະພາບອາກາດຈາກລະບົບລະບາຍອາກາດສະເພາະຈຸດ (LEV : Local Exhaust Ventilation) ໂດຍວິເຄາະໂຕວັດແທກຈາກວັດຖຸດິບ ແລະ ສານເຄມີທີ່ນຳໃຊ້ ກວດກາວັດແທກສິ່ງແວດລ້ອມໃນສະຖານປະກອບການ (Work place) ບໍລິການກວດກາວັດແທກ ແລະ ວິເຄາະຄຸນນະພາບສິ່ງແວດລ້ອມທາງດ້ານກາຍະພາບ (Physical Environment) ເຊັ່ນ: ຄວາມຮ້ອນ (Heat Level), ແສງສະຫວ່າງ (Light Level), ສຽງ (Noise Level (Leq 8 hrs, Leq 5 mins), Noise Dose), ຄວາມສັ່ນສະເທືອນ (Vibration) ບໍລິການກວດກາວັດແທກ ສິ່ງແວດລ້ອມທາງດ້ານສານເຄມີ (Chemical Environmental) ເຊັ່ນ: ຝຸ່ນລະອອງ (Total Dust, Respirable Dust, Silica Dust, etc.), ຝຸ່ນຈາກໂລຫະໜັກທຸກປະເພດ (Iron Dust, Copper fume, etc.), ອາຍຈາກສານເຄມີ/ທາດອາຍພິດຕ່າງໆ ໂດຍວິເຄາະໂຕວັດແທກຈາກວັດຖຸດິບ ແລະ ສານເຄມີທີ່ນຳໃຊ້ (Benzene, Xylene, Toluene, MEK, Acetone, Hexane, Ammonia, Chlorine ,etc.), ອາຍຈາກກົດ ແລະ ດ່າງ (Sulfuric acid, Nitric acid ,etc.) ກວດກາວັດແທກສິ່ງເສດເຫຼືອ ກວດກາວັດແທກຄວາມເປັນພິດອັນຕະລາຍຂອງສິ່ງເສດເຫຼືອ ເຊັ່ນ: ຈຸດວາບໄຟ, ໂລຫະໜັກ ແລະ ອື່ນໆ ກວດກາວັດແທກການປົນເປື້ອນຂອງວັດຖຸດິບຮີໄຊເຄີ້ນທີ່ນຳເຂົ້າມາຈາກຕ່າງປະເທດເຊັ່ນ: ເສດພລາສຕິກ ແລະ ອື່ນໆ ກວດກາວັດແທກການປົນເປື້ອນສານ Polychlorinated Biphenyls (PCBs) ໃນສິ່ງເສດເຫຼືອ ຫຼື ດິນ ແລະ ອື່ນໆ ກວດກາວັດແທກຜະລິດຕະພັນ ແລະ ອື່ນໆ ບໍລິການກວດສານພິດຕົກຄ້າງ (ຢາຂ້າແມງໄມ້) ໃນຜະລິດຕະພັນທາງການກະເສດ ເຊັ່ນ: ຜັກ, ໝາກໄມ້… ບໍລິການກວດຜະລິດຕະພັນສັດ ໂດຍວັດແທກສານເຄມີຕົກຄ້າງ, ຢາຂ້າເຊື້ອ / ເຊື້ອພະຍາດ ແລະ ໂລຫະໜັກ ບໍລິການກວດທາດອາຫານເພື່ອເຮັດກາໝາຍໂພຊະນາການ (Nutrition) ແລະ ການວິເຄາະຫາອາຍຸການເກັບຂອງຜະລິດຕະພັນ (Product Shelf Life) ບໍລິການກວດຫາສານພິດ (Toxin & Bio-Toxin), ວັດຖຸເຈືອປົນອາຫານ (Food additive) ໃນທັນຍາພືດ ແລະ ຜະລິດຕະພັນອາຫານ ບໍລິການກວດແຮ່ທາດ ແລະ ໂລຫະໜັກໃນວັດຖຸດິບ ແລະ ຜະລິດຕະພັນອາຫານ ເຄື່ອງດື່ມ ບໍລິການກວດກາສານຕັດຕໍ່ພັນທຸກຳ (GMOs) / ສານພັນທຸກຳ (DNA/RNA) ໃນພືດອາຫານ, ອາຫານ, ວັດຖຸດິບອາຫານສັດ ແລະ ອາຫານສັດ ລວມເຖິງການກວດເຊື້ອໄວຮັດກໍ່ພະຍາດໃນສັດນ້ຳ ແລະ ຜະລິດຕະພັນ ບໍລິການກວດເຊື້ອຈຸລິນຊີໃນວັດຖູດິບ ແລະ ຜະລິດຕະພັນອາຫານ, ເຄື່ອງດື່ມ ບໍລິການກວດຫາສານສຳຄັນໃນສະໝຸນໄພ ບໍລິການກວດຄຸນນະພາບປັດໄຈການຜະລິດທາງການກະເສດ ເຊັ່ນ: ປຸ໋ຍ, ສ່ວນປະສົມສຳຄັນ (Active Ingredient) ດິນ ແລະ ນ້ຳ ບໍລິການກວດວັດສະດຸສຳພັດອາຫານ (Food contact material), ພາຊະນະບັນຈຸ (Packaging) ບໍລິການວິເຄາະເຄື່ອງສຳອາງ ແລະ ຜະລິດຕະພັນອື່ນທີ່ບໍ່ແມ່ນອາຫານອື່ນໆ

ໜ່ວຍງານບໍລິການຝືກອົບຮົມ-ສຳມະນາ

August 24, 2023 yoyo ໜ່ວຍງານ

ໜ່ວຍງານບໍລິການຝຶກອົບຮົມ-ສຳມະນາ ເປັນໜ່ວຍງານທີ່ມີພາລະບົດບາດໃນການ ຈັດອົບຮົມ-ສຳມະນາວິຊາການ ເພື່ອພັດທະນາບຸກຄະລາກອນທັງພາກລັດ-ພາກເອກະຊົນ ຈົນຮອດນັກຮຽນ-ນັກສຶກສາ ກ່ຽວກັບການຄຸ້ມຄອງສິ່ງແວດລ້ອມ, ການຕິດຕາມກວດກາຄຸນນະພາບສິ່ງແວດລ້ອມ, ການຄຸ້ມຄອງເຄມີ ແລະ ວັດຖຸອັນຕະລາຍ, ການບໍລິຫານຄວາມປອດໄພ ແລະ ສຸຂະພາບແຮງງານ ແລະ ອື່ນໆ ໂດຍເປັນການອົບຮົບ-ສໍາມະນາທັງທິດສະດີ ແລະ ການຈັດຕັ້ງປະຕິບັດຕົວຈິງ ແນ່ໃສ່ສາມາດເອົາຄວາມຮູ້ດັ່ງກ່າວໄປໃຊ້ໄດ້ແທ້ໃນການເຮັດວຽກຄຸ້ມຄອງສິ່ງແວດລ້ອມ ແລະ ຄວາມປອດໄພ ໂດຍໜ່ວຍງານດັ່ງກ່າວມີສິດ ແລະ ໜ້າທີ່ດັ່ງຕໍ່ໄປນີ້: ປະເມີນຄວາມຕ້ອງການໃນການຝຶກອົບຮົມກ່ຽວກັບການຄຸ້ມຄອງ ແລະ ຕິດຕາມກວດກາມົນລະພິດສິ່ງແວດລ້ອມຂອງບັນດາໂຄງການພັດທະນາ, ໂຮງງານອຸດສາຫະກຳ ລວມທັງໜ່ວຍງານພາກລັດ ແລະ ພາກເອກະຊົນ; ພັດທະນາຫຼັກສູດການຝຶກອົບຮົມ-ສຳມະນາກ່ຽວກັບການຄຸ້ມຄອງ ແລະ ຕິດຕາມກວດກາມົນລະພິດສິ່ງແວດລ້ອມ ໃຫ້ເໝາະສົມກັບກຸ່ມເປົ້າໝາຍ; ເກັບກຳ ແລະ ສ້າງຖານຂໍ້ມູນຂອງຜູ້ເຂົ້າຮ່ວມການອົບຮົມ-ສຳມະນາໃນຫຼັກສູດຕ່າງໆຂອງສູນ; ເປັນເຈົ້າການໃນການຈັດການຝຶກອົບຮົມ-ສຳມະນາ ຕາມແຜນທີ່ໄດ້ຮັບອະນຸມັດ. ຫຼັກສູດທີ່ກຳລັງພັດທະນາໃນປະຈຸບັນ ວິຊາການຄຸ້ມຄອງສິ່ງແວດລ້ອມທົ່ວໄປ ວິຊາການຄວບຄຸມມົນລະພິດທາງນໍ້າ ວິຊາການຄວບຄຸມມົນລະພິດທາງອາກາດ ວິຊາການຄວບຄຸມທາດເຄມີ ວິຊາການຄວບຄຸມສິ່ງເສດເຫຼືອປະເພດທາດແຂງ ແລະ ອື່ນໆ ການນຳໃຊ້ລະບົບຕິດຕາມການຂົນສົ່ງສິ່ງເສດເຫຼືອ (Manifest System) ວິຊາການຮັບຜິດຊອບຄວາມປອດໄພ ແລະ ສຸຂະພາບແຮງງານ ການບໍລິການອົບຮົບ-ສຳມະນາຂອງໜ່ວຍສາມາດຈັດໄດ້ທັງແບບເຊິ່ງໜ້າໃນຫ້ອງປະຊຸມ (Offline Training), ອົບຮົມຜ່ານທາງອິນເຕີເນັດ (Online Training) ໂດຍໂປຮແກມ Google meet ຫຼື ອົບຮົມສ່ວນຕົວສະເພາະອົງການຈັດຕັ້ງໃດໜື່ງ (In-House Training) ຂື້ນກັບເງື່ອນໄຂ ແລະ ຄວາມສະດວກໃນການຈັດອົບຮົມ-ສໍາມະນາ.

ໜ່ວຍບໍລິການຂໍ້ມູນວິຊາການ

August 24, 2023 yoyo ໜ່ວຍງານ

ໜ່ວຍບໍລິການຂໍ້ມູນວິຊາການເປັນໜ່ວຍງານທີ່ມີພາລະບົດບາດໃນການຊ່ວຍເຫຼືອ ແລະ ສະໜັບສະໜຸນນັກວິຊາການ ແລະ ຜູ້ຊ່ຽວຊານ ຈົນຮອດນັກຮຽນ-ນັກສຶກສາໃນຮູບແບບເປັນຜູ້ເກັບກຳຂໍ້ມູນ-ເອກະສານວິຊາການທຸກຮູບແບບ ໂດຍເອກະສານ ແລະ ຂໍ້ມູນວິຊາການຈະຖືກລວບລວມໄວ້ໃນໜ້າ “ສູນຂໍ້ມູນ” ຂອງເວັບໄຊ emac.la ນີ້ ເຊິ່ງປະກອບດ້ວຍ: ເອກະສານເຜີຍແຜ່: ໝາຍເຖິງຫ້ອງສະໝຸດເອເລັກໂຕນິກ ທີ່ຈະຈັດເກັບເອກະສານໄວ້ເປັນໝວດໝູ່ ເຊັ່ນ: ນິຕິກຳ, ສົນທິສັນຍາສາກົນ, ຄູ່ມືວິຊາການ, ມາດຕະຖານສາກົນ ແລະ ອື່ນໆ ເຊິ່ງໄດ້ມາຈາກຫ້ອງການ, ສູນ, ຄະນະວິຊາ, ສະຖາບັນ ແລະ ກະຊວງ ເຊິ່ງມີທັງເອກະສານພາຍໃນ ແລະ ຕ່າງປະເທດ => Click ຂໍ້ມູນວິຊາການ: ໝາຍເຖິງ ບົດຄວາມດ້ານວິຊາການເຊິ່ງສຳຄັນຕໍ່ການຈັດຕັ້ງປະຕິບັດການຄຸ້ມຄອງສິ່ງແວດລ້ອມ ແລະ ຄວາມປອດໄພ ເຊັ່ນ: ການຄຸ້ມຄອງສິ່ງແວດລ້ອມຂອງໂຮງງານອຸດສາຫະກຳແຕ່ລະປະເພດຄວນຈັດຕັ້ງປະຕິບັດແນວໃດ? ການຈໍາແນກປະເພດສານເຄມີເພື່ອຄວາມປອດໄພໃນການຈັດເກັບ ແລະ ຂົນສົ່ງ, ການຈັດເກັບເຄມີໃຫ້ປອດໄພ, ການຂື້ນທະບຽນເຄມີ, ບັນຊີລາຍຊື່ເຄມີ, ການນຳໃຊ້ລະບົບຕິດຕາມການຂົນສົ່ງສິ່ງເສດເຫຼືອ (Manifest System), ມາດຕະຖານການຕິດຕາມກວດກາສິ່ງແວດລ້ອມ ແລະ ວິທີການກວດກາວັດແທກ ແລະ ອື່ນໆ ເຊິ່ງຖືກສະຫຼຸບ ແລະ ສັງລວມມາຮຽບຮ້ອຍແລ້ວ ໂດຍວິຊາການ ແລະ ຜູ້ຊ່ຽວຊານຂອງ EMAC => Click

ການຈັດລະດັບຄວາມສ່ຽງຜົນກະທົບດ້ານສິ່ງແວດລ້ອມ ຂອງໂຮງງານອຸດສາຫະກຳປຸງແຕ່ງ

August 15, 2023 yoyo ການຄຸ້ມຄອງສິ່ງແວດລ້ອມຂອງໂຮງງານອຸດສາຫະກຳ

ການຈັດລະດັບຄວາມສ່ຽງຜົນກະທົບດ້ານສິ່ງແວດລ້ອມ ຂອງໂຮງງານອຸດສາຫະກຳປຸງແຕ່ງ ອິງຕາມການສະເໜີຂອງກົມອຸດສາຫະກຳ ແລະ ຫັດຖະກໍາ ກະຊວງອຸດສາຫະກຳ ແລະ ການຄ້າ ໄດ້ອອກ ຂໍ້ຕົກລົງວ່າດ້ວຍການຈັດລະດັບຄວາມສ່ຽງຜົນກະທົບດ້ານສິ່ງແວດລ້ອມຂອງໂຮງງານອຸດສາຫະກຳປຸງແຕ່ງ ສະບັບ 0948/ອຄ, ລົງວັນທີ 12 ຕຸລາ 2021 ໂດຍມີຈຸດປະສົງເພື່ອຜັນຂະຫຍາຍ ມາດຕາ 24 ຂອງກົດໝາຍວ່າອຸດສາຫະກຳປຸງແຕ່ງ ສະບັບເລກທີ 48/ສພຊ, ລົງວັນທີ 27 ທັນວາ 2013 ເຊິ່ງແບ່ງຄວາມສ່ຽງຜົນກະທົບດ້ານສິ່ງແວດລ້ອມຂອງໂຮງງານອອກເປັນ 3 ລະດັບ ດັ່ງນີ້: ລະດັບໜື່ງ ແມ່ນໂຮງງານທີ່ມີຄວາມສ່ຽງຜົນກະທົບດ້ານສິ່ງແວດລ້ອມ ຫຼື ຄວາມເປັນອັນຕະລາຍໃນລະດັບຕໍ່າ ຊຶ່ງຕ້ອງປະຕິບັດຕາມລະບຽບການຄຸ້ມຄອງ ແລະ ຄວບຄຸມໂຮງງານໃຫ້ເຂັ້ມງວດ ລະດັບສອງ ແມ່ນ ໂຮງງານທີ່ມີຄວາມສ່ຽງຜົນກະທົບດ້ານສິ່ງແວດລ້ອມ ຫຼື ຄວາມເປັນອັນຕະລາຍໃນລະດັບປານກາງ ຊຶ່ງຕ້ອງສ້າງແຜນການຄຸ້ມຄອງດ້ານສິ່ງແວດລ້ອມ ແລະ ຕິດຕາມເປັນແຕ່ລະໄລຍະ ລະດັບສາມ ແມ່ນ ໂຮງງານທີ່ມີຄວາມສ່ຽງຜົນກະທົບດ້ານສິ່ງແວດລ້ອມ ຫຼື ຄວາມເປັນອັນຕະລາຍໃນລະດັບສູງ ຊຶ່ງຕ້ອງໄດ້ເຮັດການປະເມີນຜົນກະທົບຕໍ່ສິ່ງແວດລ້ອມ, ຕ້ອງໄດ້ເຮັດການປະເມີນຜົນກະທົບຕໍ່ສິ່ງແວດລ້ອມ, ຕາມສ້າງແຜນການຄຸ້ມຄອງດ້ານສິ່ງແວດລ້ອມຢ່າງເຂັ້ມງວດ ແລະ ຕິດຕາມເປັນປະຈຳ ຂໍ້ຕົກລົງດັ່ງກ່າວປະກອບດ້ວຍມາດຕາຕ່າງໆດັ່ງນີ້: ມາດຕາ 1 ຈຸດປະສົງ ມາດຕາ 2 ການຈັດລະດັບຄວາມສ່ຽງຜົນກະທົບດ້ານສິ່ງແວດລ້ອມ ມາດຕາ 3 ຕາຕະລາງລະດັບຄວາມສ່ຽງຜົນກະທົບດ້ານສິ່ງແວດລ້ອມ ມາດຕາ 4 ການປັບປຸງຕາຕະລາງການຈັດລະດັບຄວາມສ່ຽງຜົນກະທົບດ້ານສິ່ງແວດລ້ອມ ມາດຕາ 5 ການຈັດຕັ້ງປະຕິບັດ ມາດຕາ 6 ຜົນສັກສິດ ໃນການຈັດຕັ້ງປະຕິບັດແມ່ນມອບໃຫ້ກົມອຸດສາຫະກຳ ແລະ ຫັດຖະກຳ ເປັນເຈົ້າການປະສານສົມທົບກັບພະແນກອຸດສາຫະກຳ ແລະ ການຄ້າ ແຂວງ, ນະຄອນຫຼວງ, ຫ້ອງການອຸດສາຫະກຳ ແລະ ການຄ້າ ເມືອງ, ເທດສະບານ, ນະຄອນ ແລະ ພາກສ່ວນອື່ນໆທີ່ກ່ຽວຂ້ອງ ຈັດຕັ້ງປະຕິບັດ ຂໍ້ຕົກລົງສະບັບນີ້. ດາວໂຫລດ: ກົດໝາຍວ່າດ້ວຍອຸດສາຫະກຳປຸງແຕ່ງ ສະບັບເລກທີ 48/ສພຊ, ລົງວັນທີ 27 ທັນວາ 2013 ຂໍ້ຕົກລົງວ່າດ້ວຍການຈັດລະດັບຄວາມສ່ຽງຜົນກະທົບດ້ານສິ່ງແວດລ້ອມຂອງໂຮງງານອຸດສາຫະກຳປຸງແຕ່ງ ສະບັບເລກທີ 0948/ອຄ, ລົງວັນທີ 12 ຕຸລາ 2021

archives

Author: yoyo

ສູນການຄຸ້ມຄອງສິ່ງແວດລ້ອມ ແລະ ຄວບຄຸມມົນລະພິດ ພາຍໃນເຂດເສດຖະກິດພິເສດ ແຂວງ ສະຫວັນນະເຂດ

ມາດຕະຖານການກວດກາວັດແທກອຸນຫະພູມ ໃນສະຖານທີ່ເຮັດວຽກ

ການຄຸ້ມຄອງສິ່ງແວດລ້ອມຂອງໂຮງງານອຸດສາຫະກຳປຸງແຕ່ງເຫຼັກ

Uniform Waste Manifest ແມ່ນຫຍັງ?

ມາດຕະການປັບໃໝກ່ຽວກັບການຄຸ້ມຄອງສິ່ງແວດລ້ອມ ແລະ ຄວາມປອດໄພ

ໜ່ວຍງານບໍລິການບຳບັດ-ກຳຈັດສິ່ງເສດເຫຼືອ

ໜ່ວຍບໍລິການຕິດຕາມກວດກາຄຸນນະພາບສິ່ງແວດລ້ອມ

ໜ່ວຍງານບໍລິການຝືກອົບຮົມ-ສຳມະນາ

ໜ່ວຍບໍລິການຂໍ້ມູນວິຊາການ

ການຈັດລະດັບຄວາມສ່ຽງຜົນກະທົບດ້ານສິ່ງແວດລ້ອມ ຂອງໂຮງງານອຸດສາຫະກຳປຸງແຕ່ງ